Target Magazine
ໃນວັນທີ 29 ພະຈິກ 2018, ສະມາຄົມການເງິນຈຸລະພາກ ຮ່ວມກັບທະນາຄານແຫ່ງ ສປປ ລາວ ໂດຍການສະໜັບສະໜູນຈາກອົງກອນ ອາດາ (ADA) ປະເທດລຸກຊຳບວກ ໄດ້ຈັດກອງປະຊຸມ ເພື່ອປຶກສາຫາລື ແລະ ສົນທະນາກ່ຽວກັບທ່ວງທ່າ ແລະ ວິວັດທະນາການຂອງ ການເງິນຈຸລະພາກ ກໍຄືການສ້າງເງື່ອນໄຂ ແລະ ໂອກາດ ເຂົ້າເຖິງການບໍລິການ ດ້ານການເງິນໃນ ສປປ ລາວ ເຊິ່ງຈັດຂຶ້ນຄັ້ງທຳອິດ ທີ່ນະຄອນຫຼວງວຽງຈັນ.
ໂດຍມີ ທ່ານ ພັນທະບູນ ໄຊຍະເພັດ ຮອງຫົວໜ້າກົມຄຸ້ມຄອງ ສະຖາບັນການເງິນ, ທະນາຄານແຫ່ງ ສປປ ລາວ, ຜູ້ຕາງໜ້າຈາກບັນດາ ກະຊວງທີ່ກ່ຽວຂ້ອງ, ຜູ້ໃຫ້ທຶນ ແລະ ສະມາຊິກສະມາຄົມ ການເງິນຈຸລະພາກເຂົ້າຮ່ວມ.
ທ່ານ ສົມພອນ ສີແສງລັດ ປະທານສະພາບໍລິຫານ ສະມາຄົມການເງິນຈຸລະພາກ ກ່າວວ່າ: ຈຸດປະສົງ ຂອງກອງປະຊຸມໃນຄັ້ງນີ້ ແມ່ນເພື່ອເພີ່ມຄວາມເຂົ້າໃຈ ກ່ຽວກັບການເງິນຈຸລະພາກ ການເຂົ້າເຖິງການ ບໍລິການ ທາງດ້ານການເງິນຢູ່ໃນ ສປປ ລາວ ໃຫ້ກັບລູກຄ້າ ແລະ ປະຊາຊົນທົ່ວໄປ; ເພື່ອສ້າງການຮ່ວມມື ໃຫ້ແໜ້ນແຟ້ນ ແລະ ແລກປ່ຽນບົດຮຽນລະຫວ່າງ ຜູ້ມີສ່ວນຮ່ວມຫຼັກ ໃນການໃຫ້ບໍລິການທາງ ດ້ານການ ເງິນໃນ ສປປ ລາວ.
ພ້ອມນັ້ນ ຍັງມີການປຶກສາຫາລື ປະເດັນສຳຄັນຕ່າງໆເຊັ່ນ: ຍຸດທະສາດການເຂົ້າເຖິງ ການບໍລິການທາງດ້ານການເງິນ, ປະສົບການໃນການຄຸ້ມຄອງ ແລະ ປະຕິບັດຕາມລະບຽບ ຫຼັກການ, ການນຳໃຊ້ເຕັກໂນໂລຊີ ແລະ ຊ່ອງທາງການບໍລິການຕ່າງໆ, ນັບທັງການໃຫ້ຄວາມຮູ້ແກ່ລູກຄ້າ ແລະ ການປົກປ້ອງຜູ້ບໍລິໂພກ.
ໃນໂອກາດນີ້, ທ່ານ ພັນທະບູນ ໄຊຍະເພັດ ກ່າວວ່າ: ກອງປະຊຸມຄັ້ງນີ້ ແມ່ນມີຄວາມສຳຄັນຫຼາຍ ເພາະມີຕົວແທນຈາກຫຼາຍພາກສ່ວນ ທີ່ກ່ຽວຂ້ອງໃນຂະແໜງ ການເງິນຈຸລະພາກທັງສູນກາງ ແລະ ທ້ອງຖິ່ນເຂົ້າຮ່ວມ ເພື່ອຮັບຟັງບົດຮຽນຕ່າງໆ ກ່ຽວກັບບັນຫາໃໝ່ຄື: ການເຂົ້າເຖິງການ ບໍລິການ ທາງດ້ານການເງິນ, ການແລກປ່ຽນສົນທະນາ ແລະ ການຮ່ວມມືກັນໃນຍຸກ 4.0.
ໃນລະຫວ່າງກອງປະຊຸມ, ບັນດາຜູ້ເຂົ້າຮ່ວມໄດ້ຮັບຟັງ ການບັນລະຍາຍການເຂົ້າເຖິງ ການບໍລິການ ດ້ານການເງິນ ແບບທົ່ວເຖິງໃນ ສປປ ລາວ ຈາກຜູ້ຊ່ຽວຊານທີ່ມາຈາກ ຂະແໜງການຕ່າງໆເຊັ່ນ: ທະນາຄານ ແຫ່ງ ສປປ ລາວ, ທະນາຄານພັດທະນາລາວ, ທະນາຄານການຄ້າຕ່າງ ປະເທດລາວ, ກະຊວງກະສິກຳ ແລະ ປ່າໄມ້, ກະຊວງອຸດສາຫະກຳ ແລະ ການຄ້າ, ສະພາອຸດສາຫະກຳ ແລະ ການຄ້າ ແຫ່ງ ສ ປປ ລາວ ແລະ ບັນດາສະຖາບັນການເງິນຈຸລະພາກ.
ປັດຈຸບັນ, ສະມາຄົມການເງິນຈຸລະພາກ ມີສະມາ ຊິກທັງໝົດ 109 ແຫ່ງ, ໃນນັ້ນ ມີ 91 ສະຖາບັນການເງິນຈຸລະພາກ.
ຂ່າວ: ສິງຄຳ, ພາບ: ອ່າຍຄຳ
