ກອງປະຊຸມລັດຖະມົນຕີແຮງງານ ອາຊຽນຄັ້ງທີ 25 ທີ່ໄດ້ຈັດຂື້ນ ຢູ່ ກົວລາລຳເປີ ປະເທດ ມາເລເຊຍ ໃນວັນທີ 29 ພະຈິກ 2018 ຜ່ານມານີ້, ໄດ້ມີການປຶກສາຫາລື ກຽ່ວກັບ ການສົ່ງເສີມອາຊີບສີຂຽວ ເພື່ອຄວາມຈະເລີນກ້າວໜ້າ ຕາມວິໄສທັດຮ່ວມກັນຂອງປະຊາຄົມອາຊຽນ.
ໃນໂອກາດເຂົ້າຮ່ວມ ຄັ້ງນີ້, ທ່ານ ປອ ຄຳແພງ ໄຊສົມແພງ ລັດຖະມົນຕີກະຊວງ ແຮງງານ ແລະ ສະຫວັດດີການສັງຄົມ ໄດ້ມີຄຳເຫັນວ່າ: ປັດຈຸບັນ ສາມຂະແໜງການໃຫຍ່ໃນໂຄງປະກອບເສດຖະກິດຂອງ ກະສິກຳ ແລະ ການບໍລິການ ມີຫຼາກຫຼາຍ ສາຂາຊີບ ທີ່ຕິດພັນກັບວິຖີຊີວິດ ແລະ ທ່າແຮງຂອງປະຊາກອນແຕ່ລະເທດ, ໃນນັ້ນ ອາຊີບເປັນມິດຕໍ່ສິ່ງແວດລ້ອມ ແລະ ປົກປ້ອງສັງຄົມ ຫຼື ອາຊີບສີຂຽວ ໄດ້ກາຍເປັນຂົງເຂດວຽກງານທີ່ພົ້ນເດັ່ນ ແລະ ກ່ຽວກັບການພັດທະນາເສດຖະກິດ-ສັງຄົມ ແລະ ການປ່ຽນແປງຢ່າງໄວວາ ຂອງນະວັດຕະກຳ ແລະ ເຕັກໂນໂລຊີ,
ເຊິ່ງ ສປປ ລາວ ເຫັນຄວາມສໍາຄັນ ແລະ ສະໜັບສະໜູນຈຸດປະສົງຂອງວຽກງານກ່ຽວກັບອາຊີບສີຂຽວດັ່ງກ່າວ ທັງເປັນຂົງເຂດໜຶ່ງພາຍໃຕ້ການເຮັດວຽກທີ່ມີຄຸນຄ່າ ແລະ ເປັນທຳ. ດັ່ງໄລຍະຜ່ານມາ ສປປ ລາວ ໄດ້ສຶກສາ ແລະ ພິຈາລະນາ ສະພາບ, ເຫດຜົນ ແລະ ເງື່ອນໄຂຕ່າງໆ ທີ່ປິ່ນອ້ອມ ແລະໄດ້ກຳນົດນະໂຍບາຍ, ແຜນງານ ແລະ ຈັດຕັ້ງປະຕິບັດໄດ້ຈຳນວນໜຶ່ງຄື: ດຳລັດວ່າດ້ວຍສຸຂະພາບ ແລະ ຄວາມປອດໄພ ແຮງງານ ເຊິ່ງລັດຖະບານ ສປປ ລາວ ໄດ້ຮັບຮອງ ແລະ ກຽມທີ່ຈະປະກາດໃຊ້ໃນໄວໆນີ້, ການຮ່າງແຜນຍຸດທະສາດແຫ່ງຊາດ ໃນການສົ່ງເສີມວຽກເຮັດງານທຳໃນຊົນນະບົດ ເຊິ່ງເປັນວຽກງານໜຶ່ງໃນການຈັດຕັ້ງປະຕິບັດຖະແຫລງການວຽງຈັນວ່າດ້ວຍການຫັນປ່ຽນ ຈາກການຈ້າງງານນອກລະບົບ ໄປສູ່ ການຈ້າງງານໃນລະບົບ ແລະ ອື່ນໆ.
ແນວໃດກໍດີ ໃນກອງປະຊຸມປະຊຸມສໍາມະນາ ກ່ຽວກັບ ການພັດທະນາຊັບພະຍາກອນມະນຸດ ໄດ້ມີການນຳສະເໜີຜົນການຈັດຕັ້ງປະຕິບັດກ່ຽວກັບການພັດທະນາຊັບພະຍາກອນມະນຸດ ໃນຫົວຂໍ້ “ ການສົ່ງເສີມອາຊີບສີຂຽວ ເພື່ອຄວາມຍຸຕິທຳ ແລະ ຄວາມຈະເລີນກ້າວໜ້າ ຕາມວິໄສທັດຮ່ວມກັນຂອງປະຊາຄົມອາຊຽນ” ເຊິ່ງໄດ້ນຳສະເຫນີ ແລະ ແລກປ່ຽນບົດຮຽນ ແລະ ປະສົບການຕ່າງໆ ກ່ຽວກັບວິຊາອາຊີວະສຶກສາ ແລະ ພັດທະນາສີມືແຮງງານ ເພື່ອສົ່ງເສີມວິຊາຊີບສີຂຽວ,
ສປປ ລາວ ຂໍສະແດງຄວາມຊົມເຊີຍຕໍ່ຜົນສໍາເລັດຂອງກອງປະຊຸມດັ່ງກ່າວ ແລະ ພ້ອມທີ່ຈະຮ່ວມແຮງຮ່ວມໃຈ ກັບບັນດາປະເທດສະມາຊິກອາຊຽນ ແລະ ປະເທດຄູ່ເຈລະຈາ ຈັດຕັ້ງປະຕິບັດຕາມແຜນງານແຕ່ລະໄລຍະຂອງວຽງງານນີ້.
ທ່ານ ລັດຖະມົນຕີ ຍັງໄດ້ກ່າວວ່າ: ສໍາລັບ ສປປ ລາວ, ການພັດທະນາຊັບພະຍາກອນມະນຸດ ໂດຍສະເພາະ ການສ້າງ ແລະ ພັດທະນາ ສີມືແຮງງານ ຍັງມີຫຼາຍບັນຫາ ທີ່ເປັນຂໍ້ຫຍຸ້ງຍາກ ແລະ ສິ່ງທ້າຍທາຍ ສະນັ້ນ ຈຶ່ງຕ້ອງມີການຮ່ວມມືກັບບັນດາປະເທດ ສະມາຊິກອາຊຽນ ແລະ ຄູ່ເຈລະຈາ ເພື່ອເຮັດໃຫ້ວຽກງານດັ້ງກ່າວສຳເລັດຜົນ.
ຂໍ້ມູນຈາກ: ຂ່າວສານແຮງງານ ແລະ ສະຫວັດດີການສັງຄົມ.