ວັນທີ 31 ຕຸລາ 2018 ທີ່ກະຊວງການເງິນ ໄດ້ມີພິທີເຊັນສັນຍາເງິນກູ້ຢືມຈາກທະນາຄານໂລກ 10 ລ້ານໂດລາສະຫະລັດ ຫຼື ປະມານ 85 ຕື້ກີບ ພາຍໃຕ້ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ບັນດາທຸລະກິດ ແລະ ຄົວເຮືອນໃນລາວ ຈະໄດ້ຮັບຜົນປະໂຫຍດຈາກການປັບປຸງສະພາບແວດລ້ອມ ໃນການດຳເນີນທຸລະກິດ ເຊັ່ນ: ການຫຼຸດຈຳນວນມື້ໃນການຂໍອະນຸຍາດສ້າງຕັ້ງທຸລະກິດ ຮ່ວມລົງນາມລະຫວ່າງ ທ່ານນາງ ທິບພະກອນ ຈັນທະວົງສາ ຮອງລັດຖະມົນຕີກະຊວງການເງິນ ແລະ ທ່ານ ນິໂກລາ ປອນຕາຣາ ຫົວໜ້າຫ້ອງການທະນາຄານໂລກ ປະຈຳລາວ ໂຄງການຈະສະໜັບສະໜູນຄວາມພະຍາຍາມຂອງລັດຖະບານ ໃນການຫຼຸດຂັ້ນຕອນການຄຸ້ມຄອງທຸລະກິດ ອຳນວຍຄວາມສະດວກດ້ານການຄ້າ ແລະ ປັບປຸງຄວາມສາມາດໃນການແຂ່ງຂັນ ບໍລິສັດລາວທີ່ກຳລັງດຳເນີນທຸລະກິດຢູ່ ແລະ ທີ່ສ້າງຕັ້ງໃໝ່ ຈະໄດ້ຮັບປະໂຫຍດຈາກການຫຼຸດຜ່ອນຕົ້ນທຶນ ໃນການດຳເນີນທຸລະກິດ ມີຂັ້ນຕອນທີ່ສະດວກກວ່າເກົ່າ ແລະ ເຂົ້າເຖິງແຫຼ່ງທຶນເພື່ອປັບປຸງທຸລະກິດຂອງຕົນ ການປັບປຸງເຫຼົ່ານີ້ ຍັງຈະມີຜົນປະໂຫຍດໃຫ້ແກ່ປະຊາຊົນລາວທົ່ວໄປ ເນື່ອງຈາກການປັບປຸງເຫຼົ່ານັ້ນ ຈະຊຸກຍູ້ໃຫ້ມີການສ້າງວຽກເຮັດງານທຳເພີ່ມຂຶ້ນ ແລະ ນຳໄປສູ່ການແຂ່ງຂັນຫຼາຍຂຶ້ນ ລາຄາສິນຄ້າຈະຄ່ອຍຫຼຸດລົງ ແລະ ເພີ່ມທາງເລືອກໃຫ້ຜູ້ບໍລິໂພກ.
ທ່ານ ນິໂກລາ ປອນຕາຣາ ກ່າວວ່າ: “ການປັບປຸງສະພາບແວດລ້ອມໃນການດຳເນີນທຸລະກິດ ສາມາດດຶງດູດການລົງທຶນທີ່ມີຄຸນະພາບສູງເຂົ້າມາລາວ ພາກທຸລະກິດມີຄວາມເຂັ້ມແຂງຂຶ້ນ ກໍ່ຈະຊ່ວຍເພີ່ມຄວາມຫຼາກຫຼາຍໃຫ້ການຂະຫຍາຍຕົວຂອງເສດຖະກິດ ແລະ ສ້າງວຽກເຮັດງານທຳໃຫ້ປະຊາຊົນຫຼາຍຂຶ້ນ” ນອກຈາກການສຸມໃສ່ການປັບປຸງຄວາມໂປ່ງໃສ ແລະ ປະສິດທິພາບຂອງລະບຽບການດ້ານທຸລະກິດແລ້ວ ໂຄງການນີ້ ມີຈຸດປະສົງຊ່ວຍໃຫ້ທຸລະກິດຂະໜາດກາງ ແລະ ຂະໜາດນ້ອຍ ລວມທັງບັນດາທຸລະກິດທີ່ນຳພາໂດຍແມ່ຍິງອີກດ້ວຍໄດ້ຮັບຜົນປະໂຫຍດ.
ສຳລັບໄລຍະເວລາຈັດຕັ້ງປະຕິບັດໂຄງການປີ 2018-2022 ໂດຍໂຄງການໄດ້ຮັບທຶນກູ້ຢືມແບບຜ່ອນຜັນ 10 ລ້ານໂດລາ ຈາກສະມາຄົມພັດທະນາສາກົນ (ພາຍໃຕ້ທະນາຄານໂລກ) ແລະ ທຶນຊ່ວຍເຫຼືອລ້າຫຼາຍຝ່າຍ ຈາກບັນດາຜູ້ໃຫ້ທຶນອື່ນໆອີກຈຳນວນ 3 ລ້ານໂດລາ.
ຂໍ້ມູນ: ໜັງສືພິມ ວຽງຈັນໃຫມ່