Target Magazine
ເສດຖະກິດຂອງ ສປປ ລາວ ມີຄວາມເປັນໄປໄດ້ທີ່ຈະປະເຊີນກັບການທົດຖອຍຈາກການຄາດຄະເນການຂະຫຍາຍຕົວ 6.4% ມາເປັນ 6% ໃນປີນີ້ ເນຶ່ອງຈາກອິດທິພົນການແຜ່ລະບາດຂອງໄວຣັດໂຄວິດ-19 (COVID-19) ຢູ່ຫຼາຍປະເທດໃນໂລກ.
ສປປ ລາວ ກໍ່ເປັນປະເທດໜຶ່ງທີ່ກຳລັງໄດ້ຮັບໄພຄົ່ມຂູ່ຢ່າງຫຼວງຫຼາຍຈາກພະຍາດດັ່ງກ່າວ ແລະ ລັດຖະບານກຳລັງດຳເນີນມາດຕະການຕ່າງໆ ເພື່ອປ້ອງກັນ ແລະ ຕອບໂຕ.
ທ່ານ ປ.ອ ລີເບີ ລີບົວປາວ ຮັກສາການ ຫົວໜ້າ ສະຖາບັນຄົ້ນຄວ້າເສດຖະກິດ ແຫ່ງຊາດ ໄດ້ໃຫ້ສຳພາດຕໍ່ໜັງສືພິມວຽງຈັນທາຍ ໃນວັນຈັນທີ່ຜ່ານມາວ່າ: ເຖິງແມ່ນວ່າ ປະເທດເຮົາຍັງບໍ່ທັນພົບພະຍາດນີ້ກໍ່ຕາມ ແຕ່ໄວຣັດດັ່ງກ່າວໄດ້ສົ່ງຜົນກະທົບຕໍ່ເສດຖະກິດໄປແລ້ວຢ່າງຫຼວງຫຼາຍ.
ຂະແໜງທຳອິດທີ່ຖືກກະທົບຫຼາຍທີ່ສຸດ ແມ່ນ ການທ່ອງທ່ຽວ, ການລົງທຶນ ແລະ ການຄ້າ. ພະຍາດດັ່ງກ່າວ ກຳລັງກົດໜ່ວງການຂະຫຍາຍຕົວຂອງຂະແໜງການສຳຄັນເຫຼົ່ານີ້, ເຊິ່ງເປັນໄມ້ງັດອັນສໍາຄັນທາງດ້ານເສດຖະກິດ.
ທ່ານ ລີເບີ ໄດ້ກ່າວຕື່ມອີກວ່າ: ຈຳນວນນັກທ່ອງທ່ຽວຕ່າງປະເທດ ເຊັ່ນວ່າ: ຈີນ ແລະ ເກົາຫຼີໃຕ້ ໄດ້ຍົກເລີກແຜນການເດີນທາງມາທ່ຽວ ສປປ ລາວ, ບັນຍາກາດແຫຼ່ງທ່ອງທ່ຽວຕ່າງໆ ກໍ່ງຽບເຫງົາ ເພາະຈຳນວນນັກທ່ອງທ່ຽວໄດ້ຫຼຸດລົງ.
ສະພາບການຂອງການແຜ່ລະບາດຂອງໄວຣັດ ໂຄວິດ-19 ບໍ່ໄດ້ສົ່ງຜົນກະທົບພຽງແຕ່ ປະເທດຈີນ ທີ່ເປັນປະເທດທຳອິດມີການກວດພົບພະຍາດດັ່ງກ່າວ ຢູ່ເມືອງອູຮັນ, ແຕ່ພະຍາດດັ່ງກ່າວຍັງສືບຕໍ່ແຜ່ລະບາດໄປຢ່າງກ້ວາງຂວາງໃນຫຼາຍປະເທດຢູ່ໃນໂລກ.
ລາຍໄດ້ຈາກການທ່ອງທ່ຽວ, ເຊິ່ງເປັນແຫຼ່ງລາຍຮັບສຳຄັນ ຂອງ ສປປ ລາວ ໄດ້ຫຼຸດລົງຢ່າງຊັດເຈນ ເນື່ອງຈາກວ່າ ບັນດາທຸລະກິດຂົນສົ່ງຜູ້ໂດຍສານຈາກພາຍໃນ ແລະ ຕ່າງປະເທດຈໍານວນໜຶ່ງໄດ້ໂຈະການບໍລິການ.
ທ່ານ ລີເບີ ຍັງໄດ້ອະທິບາຍໃຫ້ເຫັນເຖິງຜົນກະທົບຂອງໄວຣັດນີ້ ຕໍ່ຂະແໜງການລົງທຶນ ແລະ ການຄ້າວ່າ: ນັກລົງທຶນ ກໍ່ໄດ້ໂຈະແຜນການເດີນທາງເຂົ້າມາປະເທດລາວ ສະນັ້ນ ການດຳເນີນໂຄງການ ກໍ່ຕ້ອງໄດ້ເລື່ອນໄປຕາມໆກັນ.
ໄວຣັດ COVID-19 ສ້າງຄວາມຍຸ້ງຍາກບໍ່ສະເພາະໃຫ້ແກ່ຄົນເທົ່ານັ້ນ ແຕ່ການຈໍລະຈອນສິນຄ້າ ເຂົ້າ-ອອກ ປະເທດ ກໍ່ພົບຄວາມຫຍຸ້ງຍາກເຊັ່ນກັນ.
ການຂະຫຍາຍຕົວຂອງເສດຖະກິດ ແມ່ນພົວພັນກັບການບໍລິການ, ການລົງທຶນ ແລະ ການຄ້າ. ຖ້າປັດໄຈເຫຼົ່ານີ້ຖືກກະທົບການຂະຫຍາຍຕົວຂອງເສດຖະກິດກໍ່ຈະຊັກຊ້າລົງ ໃນປີ 2020, ອີງຕາມການຄາດຄະເນຂອງນັກຄົ້ນຄ້ວາຈາກສະຖາບັນ.
ທ່ານ ລີເບີ ເວົ້າວ່າ: ປີ 2020 ລັດຖະບານໄດ້ວາງແຜນການຂະຫຍາຍຕົວຂອງເສດຖະກິດ 6,7% ເພີ່ມຂຶ້ນປະມານ 0,3% ທຽບໃສ່ປີຜ່ານມາ ແຕ່ປີນີ້ ມີຄວາມເປັນໄປໄດ້ທີ່ຈະບໍ່ບັນລຸເປົ້າໝາຍທີ່ກຳນົດໄວ້. ປີ 2020 ເປັນປີທີ່ມີຄວາມທ້າທາຍໃຫຍ່ກວ່າປີຜ່ານມາ.
ທ່ານ ລີເບີ ຄາດຄະເນວ່າ ການຫຼຸດລົງຂອງເສດຖະກິດໃນປີນີ້ ອາດຈະຕ່ຳທີ່ສຸດໃນຮອບ 5 ປີ, ຖ້າພະຍາດດັ່ງກ່າວຫາກສືບຕໍ່ລະບາດແກ່ຍາວໄປດົນເທົ່າໃດ ຍິ່ງສົ່ງຜົນກະທົບໜັກເທົ່ານັ້ນ.
ສະນັ້ນ, ສິ່ງຈະຕ້ອງເອົາໃຈໃສ່ທີ່ສຸດແມ່ນການຕິດຕາມ ແລະ ປ້ອງກັນການແຜ່ລະບາດ ບໍ່ໃຫ້ພະຍາດດັ່ງກ່າວເກີດຂຶ້ນ ຢູ່ໃນ ສປປ ລາວ. ພວກເຮົາຕ້ອງປ້ອງກັນຊິວິດຂອງຄົນ ເປັນບູລິມະສິດອັນດັບໝຶ່ງ ແລະ ຕ້ອງຍອມຮັບການທົດຖອຍຂອງເສດຖະກິດ ທ່ານ ລີເບີ ກ່າວໃນຕອນທ້າຍຂອງການສຳພາດ.
ຂ່າວ: ມະນີຈັນ
ທີ່ມາ: ໜັງສືພິມ ວຽງຈັນທາຍ
