ໃນ ປີ 2019 ນີ້, ກະຊວງແຮງງານ ແລະ ສະຫວັດດີການສັງຄົມ ໄດ້ຮັບການອະນຸມັດຈາກ ລັດຖະບານ ແຫ່ງ ສປປ ລາວ ແລະ ລັດຖະບານຍີ່ປຸ່ນ ໃນການຈັດຕັ້ງປະຕິບັດໂຄງການຄັງແຮເຂົ້າຊ່ວຍເຫຼືອຜູ້ປະສົບໄພພິບັດ ປີ 2018 ໃນຂອບເຂດທົ່ວປະເທດ ພາຍໃຕ້ກອງທຶນເພື່ອຮ່ວມງານ KR1, ສະນັ້ນ, ໃນໂອກາດລົງເຄື່ອນໄຫວວຽກງານແຮງງານ ແລະ ສະຫວັດດີການສັງຄົມ ຢູ່ບັນດາແຂວງພາກເໜືອ ໃນລະຫວ່າງວັນທີ 11 – 14 ສິງຫາ 2019 ນີ້.
ທີ່ພະແນກແຮງງານ ແລະ ສະຫວັດດີການແຂວງ , ທ່ານ ປອ ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ພ້ອມຄະນະ, ໄດ້ຕາງໜ້າລັດຖະບານ ມອບເຄື່ອງຊ່ວຍເຫຼືອໃຫ້ແກ່ປະຊາຊົນຜູ້ປະສົບໄພພິບັດ ຢູ ່ແຂວງຫົວພັນ, ຊຽງຂວາງ ແລະ ໄຊສົມບູນ ລວມມູນຄ່າ 2 ຕື້ ກວ່າກີບ, ເຊິ່ງຕາງໜ້າຮັບໂດຍ ທ່ານເຈົ້າແຂວງ ແລະ ຮອງເຈົ້າແຂວງທັງ 3 ແຂວງດັ່ງກ່າວ ພ້ອມຄະນະ ພະແນກແຮງງານ ຮສສ ແຂວງ ກ່າວຮັບ ພ້ອມທັງລາຍງານສະພາບການໂດຍຫຍໍ້.
ເຄື່ອງຊ່ວຍເຫຼືອທີ່ນຳມາມອບໃນຄັ້ງນີ້ ປະກອບມີ: ມອບໃຫ້ປະຊາຊົນແຂວງຫົວພັນ ເຂົ້າສານໜ່ຽວ ຈາກກອງທຶນເພື່ອນຮ່ວມງານ KR1 ຈຳນວນ 97.860 ກິໂລ ລວມມູນຄ່າ 787 ລ້ານກວ່າກີບ ; ເຄື່ອງນຸ່ງຫົມ ແລະ ເກີບ ຈາກ ສ.ເກົາຫຼີ ຈຳນວນ 100 ແກັດ ມູນຄ່າ 150 ລ້ານກີບ ແລະ ເງີນກອງທືນນຳມັນ ຈຳນວນ 50 ລ້ານກີບ.
ແຂວງ ຊຽງຂວາງ ເຂົ້າສານໜ່ຽວ 85.512 ກິໂລ ມູນຄ່າ 688 ລ້ານກວ່າກີບ , ເຄື່ອງອຸປະໂພກ-ບໍລິໂພກ, ເຄື່ອງໃຊ້ຄົວເຮືອນ ລວມມູນຄ່າ 72 ລ້ານກວ່າກີບ, ເຄື່ອງນຸ່ງຫົມ ແລະ ເກີບ ຈາກ ສ.ເກົາຫຼີ ຈຳນວນ 100 ແກັດ ມູນຄ່າ 150 ລ້ານກີບ ແລະ ເງີນກອງທືນນຳມັນ ຈຳນວນ 50 ລ້ານກີບ ແລະ ແຂວງໄຊສົມບູນ ເຂົ້າສານໜ່ຽວ 10.572 ກິໂລ ມູນຄ່າ 85 ລ້ານກວ່າກີບ ແລະ ເຄື່ອງນຸ່ງຫົ່ມ ແລະ ເກີບ 100 ແກັດ ມູນຄາ 150 ລ້ານກີບ .
(ຂ່າວ-ພາບ ຮຮສ)