Prudential 450×100

ເຊີນທ່ຽວສາລະວັນ

ແບ່ງປັນ:

ມື້ນີ້ວາລະສານ ທາເກັດ ຈະມາແນະນໍາໃຫ້ທຸກທ່ານໄດ້ຮູ້ຈັກກັບແຂວງສາລະວັນ ແລະ ແຫຼ່ງທ່ອງທ່ຽວບາງສະຖານທີ່ ແຂວງສາລະວັນ ຕັ້ງຢູ່ທາງພາກໃຕ້ຂອງປະເທດລາວ  ເປັນແຂວງທີ່ມີເສດຖະກິດພວມຂະຫຍາຍຕົວ, ມີຫຼາຍຊົນຊາດຊົນເຜົ່າດຳລົງຊີວິດຢູ່ດ້ວຍກັນ ເມືອງເອກຂອງແຂວງ ແມ່ນເມືອງ ສາລະວັນ ເຊິ່ງມີດິນແດນສ່ວນໜຶ່ງກວມເອົາພູພຽງບໍລະເວນອັນອຸດົມຮັ່ງມີຂອງແຂວງເໝືອນດັ່ງຄໍາຂັວນທີ່ວ່າ: “ ຫມາກພ້າວນາໄຊ ປິ້ງໄກ່ນາປົ່ງ ເຫລົ້າຂາວເມືອງຄົງ ລໍາວົງສາລະວັນ ” ເປັນຄໍາຂັວນແຂວງສາລະວັນ ທີ່ອຸດົມສົມບູນໄປດ້ວຍຊັບໃນດິນສິນໃນນໍ້າດັ່ງຄໍາເວົ້າແຕ່ກ່ອນແຕ່ເດີມທີ່ວ່າ: ສາລະວັນຂີ້ໄຮ້ຂາຍຊ້າງແລກກະບອງ ແລະ ແຕ່ກ່ອນໄດ້ມີຕົ້ນຮັງ( ສາລະ ) ເກີດຂຶ້ນຫຼາຍຈຶ່ງເປັນທີ່ມາຂອງຊື່ສາລະວັນທີ່ໝາຍເຖິງດິນແດນແຫ່ງຕົ້ນຮັງ ແລະ ຍັງປະກອບດ້ວຍສະຖານທີ່ທ່ອງທ່ຽວທີ່ສໍາຄັນຫຼາກຫຼາຍບໍ່ວ່າຈະເປັນທາງທໍາມະຊາດ ແລະ ທາງປະຫວັດສາດເຊັ່ນ: ອະນຸສາວະລີອົງແກ້ວ-ສວນແຄນ, ນໍ້າຕົກຕາດເລາະ-ຕາດຮັງ, ນໍ້າຕົກຕາດເທວະດາ, ນໍ້າຕົກຕາດສູງ( ເຊເຊັດ ), ວັດກາງ, ຂົວທ່ານສຸພານຸວົງ, ຫັດຖະກໍາຕໍ່າແຜ່ນແພ ບ້ານຫ້ວຍຫູນ, ກອງເສົາຊໍ່-ເສົາເສ, ຕາດເສນ, ຕາດໄມ້ເຮ້ຍ, ປີ້ງໄກ່ນາປົ່ງ ແລະ ຍັງອີກຫຼາຍໆສະຖານທີ່.

    ອະນຸສາວະລີອົງແກ້ວ-ສວນແຄນ: ເປັນອະນຸສະຖານທີ່ຈາລຶກເຖິງຄຸນງາມຄວາມດີຂອງອົງແກ້ວ ວິລະບູລຸດຂອງຊາດລາວເຮົາທີ່ໄດ້ສ້າງວິລະກໍາອັນລໍ້າເລີດ ນໍາພາປະຊາຊົນລາວລຸກຮືຂຶ້ນຕໍ່ສູ້ຕ້ານຈັກກະພັດຝຣັ່ງຢ່າງອົງອາດກ້າຫານ ອົງແກ້ວເກີດທີ່ບ້ານຈະກໍາ ເມືອງທ່າແຕງ ແຂວງເຊກອງ ແລະ ເສຍຊີວິດໃນວັນທີ 12 ພະຈິກ 1910 ອະນຸສາວະລີອົງແກ້ວມີຄວາມສູງ 8,60 ແມັດເຊິ່ງລວມມີຮູບປັ້ນຫລໍ່ທ່ານອົງແກ້ວທີ່ສູງ 5 ແມັດ ແລະ ຖານຮອງຮູບປັ້ນ.

 

ນໍ້າຕົກຕາດເລາະ – ຕາດຮັງ: ຕັ້ງຢູ່ບ້ານແສນວັງ ເມືອງສາລະວັນ ຫ່າງຈາກຕົວເມືອງປະມານ 31 ກິໂລແມັດ ຖືກຄົ້ນພົບໃນປີ 1985 ແລະ ເປີດໃຫ້ເຂົ້າທ່ຽວຊົມຢ່າງເປັນທາງການເມື່ອປີ 1990 ເປັນຕົ້ນມາ. ຄໍາວ່າ: “ ຕາດເລາະ ” ມີກົກເຄົ້າມາຈາກພາສາຂອງເຜົ່າທີ່ອາໄສຢູ່ແຖບນີ້ຄືຄໍາວ່າ: “ ໂລະ ” ມີຄວາມໝາຍວ່າອະໄວຍະວະເພດຊາຍ, ໂດຍມີຕໍານານເລົ່າຂານເຖິງສອງສາວເອື້ອຍນ້ອງທີ່ໄດ້ເຮັດການພະນັນຂັນຕໍ່ທ້າໃຫ້ພໍ່ເຖົ້າໂຕນລົງນໍ້າຢູ່ຕາດນີ້ ຖ້າກ້າໂຕນພວກເຂົາຊິຍອມເປັນເມຍ ພໍ່ເຖົ້າຜູ້ນັ້ນກໍແກ້ເຄື່ອງປະເປືອຍຈົນເຫັນໂລະແຫ່ວຍານແລ້ວໂດດລົງໄປດົນເຕີບ ສອງນ້ອງເອື້ອຍພາກັນຄິດວ່າພໍ່ເຖົ້າຕາຍແລ້ວແຕ່ໂຊກເຂົ້າຂ້າງພໍ່ເຖົ້າດວງດີຄາດຊິໄດ້ເມຍສາວນ້ອຍສາມາດເງີຍຫົວຂຶ້ນມາຈາກນໍ້າຢ່າງປອດໄພຈຶ່ງເປັນອັນວ່າສອງສາວນັ້ນຈໍາຕ້ອງພາກັນປະຕິບັດຕາມສັນຍາຍອມເປັນເມຍພໍ່ເຖົ້າຜູ້ກ້າຫານນີ້ ຈຶ່ງເປັນທີ່ມາຂອງຕາດໂລະ ຫຼື ຕາດເລາະຈົນເທົ່າທຸກມື້ນີ້.

    ຫັດຖະກໍາຕໍ່າແຜ່ນແພ ບ້ານຫ້ວຍຫູນ: ຫັດຖະກໍາຕໍ່າແຜ່ນຂອງເຜົ່າກະຕູ່ແມ່ນຢູ່ບ້ານຫ້ວຍຫູນ ເມືອງເລົ່າງາມ ຫ່າງຈາກເມືອງເລົ່າງາມປະມານ 10 ກິໂລແມັດ ເຊິ່ງບ້ານດັ່ງກ່າວນີ້ໄດ້ພາກັນຍົກຍ້າຍຖິ່ນຖານມາຈາກບ້ານປະລຸ ແຂວງຕາເວັນອອກ( ແຂວງ ເຊກອງໃນປັດຈຸບັນ ) ໃນກາງຊຸມປີ 1970 ປະຊາຊົນພາຍໃນບ້ານສ່ວນໃຫຍ່ແມ່ນເຜົ່າກະຕູ່ເຊິ່ງເປັນເຜົ່າທີ່ມີພາສາປາກເວົ້າສະເພາະ ແລະການນຸ່ງຖືເປັນເອກະລັກ ເຜົ່າດັ່ງກ່າວແມ່ນເຊື່ອຖືສາດສະໜາຜີ( ບັນພະບູຣຸດ ) ສິ່ງທີ່ແປກປະຫລາດຂອງເຜົ່ານີ້ແມ່ນວ່າທຸກໆຄອບຄົວຕ້ອງໄດ້ມີໂຮງສົບໄວ້ຢູ່ເຮືອນ ສິ່ງທີ່ການເປັນຈຸດດຶງດູດແກ່ນັກທ່ອງທ່ຽວໃນບ້ານນີ້ແມ່ນຜະລິດຕະພັນຫັດຖະກໍາແຜ່ນແພຂອງເຂົາເຈົ້າ ເຊິ່ງເຜົ່າກະຕູ່ເອງແມ່ນມີສີໄມ້ລາຍມືໃນການຕໍ່າຫູກທໍໄໝອັນເປັນເອກະລັກມາແຕ່ບູຮານນະການແລ້ວ ດ້ວຍເຕັກນິກການເກັບລາຍທີ່ມີຫົວຄິດປະດິດສ້າງ, ສວຍງາມ ແລະ ແຕກຕ່າງຈາກບ່ອນອື່ນຈຶ່ງເຮັດໃຫ້ນັກທ່ອງທ່ຽວທີ່ມາແວ່ຊົມບ້ານນີ້ ອົດບໍ່ໄດ້ຕ້ອງໄດ້ອຸດໜູນຊື້ສິນຄ້າຕິດໄມ້ຕິດມືກັບໄປນໍາ.

ນອກຈາກນີ້ແລ້ວແຂວງສາລະວັນ ມີຄວາມຫຼາກຫຼາຍທາງດ້ານຮີດຄອງປະເພນີເຊິ່ງສະແດງອອກຜ່ານການຮ້ອງລໍາທໍາເພງເຊັ່ນ: ລໍາສາລະວັນ ທີ່ມີຊື່ສຽງໂດ່ງດັງໄປທົ່ວປະເທດ, ລໍາຄົງເຊໂດນ, ລໍາຜູ່ໄທ, ລໍາຕາລີມອນ, ລໍາກະເລີ້ຍ ແລະ ອື່ນໆ ແລະ ຖ້າຫາກທ່ານໃດໄດ້ໄປຢ່າລືມຢ່າພາດທີ່ຈະຊິມອາຫານທີ່ມີຊື້ສຽງໂດ່ງດັງໂດຍສະເພາະແມ່ນປີ້ງໄກ່ນາປົ່ງລົດຊາດແຊບໆ, ບໍ່ວ່າໃຜໆກາຍໄປຕ້ອງໄດ້ແວ່ຊື້ຕິດໄມ້ຕິດມືກັບມາ.

ເລື່ອງທີ່ກ່ຽວຂ້ອງ

ເຊີນທ່ຽວໜອງຂຽວ ສະຖານທີ່ທ່ອງທ່ຽວທຳຊາດຂຽວອຸ່ມທຸ່ມ... ທ່ານຜູ້ອ່ານທີ່ຮັກແພງ ໃນອາທິດນີ້ ທີມງານ ທາເກັດ ຂອງພວກເຮົາ ຈະມ...
ທ່ຽວແຂວງວຽງຈັນ ສະຫວັນຂອງນັກທ່ອງທ່ຽວ.... ໃນອາທິດນີ້ ວາລະສານທາເກັດ ຈະພາທຸກທ່ານໄປທ່ຽວທີ່ແຂວງວຽງຈັນ “ເມື...
ງານລ້ຽງສ້າງສັນນີ້! ຈະແຕ່ງໂຕແນວໃດດີ?... ຈັດເບົາໆໃຫ້ເຂົ້າກັບທຸກໆງານ ບໍ່ວ່າຈະງານລ້ຽງກັບຄອບຄົວ, ຫ້ອງການ...
ກົວຟູ່ເຊິງ ໄດ້ຄອງລົດຫຼູ Ferrari FXXK ມີພຽງ 32 ຄັນໃ... ພະເອກ ກົວຟູ່ເຊິງ Aaron Kwok ອາຍຸ 50 ປີ ໄດ້ເປັນເຈົ້າຂອງລົດຫຼູ...
ພຣະທາດສາມປາງ ບູຮານສະຖານເກົ່າແກ່ຂອງຊາວເມືອງສຸຂຸມາ... ພຣະທາດສາມປາງບູຮານສະຖານເກົ່າແກ່ຂອງຊາວເມືອງສຸຂຸມາໃນທຸກໆປີເມື່ອ...
9 ສັນຍານອັນຕະລາຍ ພະຍາດໜິ້ວ... ພະຍາດໜິ້ວໃນໝາກໄຂ່ຫຼັງ ປັດຈຸບັນຄົນທຸກຊ່ວງອາຍຸບໍ່ວ່າຈະເປັນຄົນສ...
ທ່ອງທ່ຽວບໍ່ແກ້ວ ດິນແດນອັນຍະມະນີລໍ້າຄ່າ... ໃນອາທິດນີ້ ວາລະສານທາເກັດ ຈະພາທຸກທ່ານໄປທ່ຽວທີ່ແຂວງບໍ່ແກ້ວ ແຂວ...
4 ເສື້ອເຊີດໃສ່ສະບາຍທີ່ຜູ້ຊາຍຍຸກນີ້ມີໄວ້ໃນຕູ້ເຄື່ອງ... ການນຸ່ງຖືເປັນສິ່ງສຳຄັນໃນຍຸກສະໄໜນີ້ ຕ້ອງໃຫ້ເບິ່ງດູດີມີຫຼາຍສະໄ...

Comments

comments

Ooh Laos 600×100
Main menu