ການນຳພັກ-ລັດ ຕ້ອນຮັບຄະນະຜູ້ແທນຂັ້ນສູງນະຄອນໂຮຈິມິນ

ໃນໂອກາດທີ່ຄະນະຜູ້ແທນຂັ້ນສູງນະຄອນໂຮຈິມິນ ສສ ຫວຽດນາມ ນຳໂດຍສະຫາຍ ດິງ ລາ ຖັງ ກຳມະການກົມການເມືອງສູນກາງພັກກອມມູນິດຫວຽດນາມ ເລຂາຄະນະພັກນະຄອນໂຮຈິມິນ ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ນະຄອນຫຼວງວຽງຈັນ ລະຫວ່າງວັນທີ 29 ພຶດສະພາ ຫາ 1 ມິຖຸນາ 2016 ນີ້. ໃນວັນທີ 30 ພຶດສະພາ 2016 ໄດ້ເຂົ້າຢ້ຽມຄຳນັບສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ທີ່ຫ້ອງຮັບແຂກ ຫ້ອງວ່າການສູນກາງພັກ, ພ້ອມນີ້ຍັງໄດ້ເຂົ້າຢ້ຽມ ສະຫາຍ ທອງລຸນ ສີສຸລິດ ກຳມະການກົມການເມືອງສູນກາງພັກ ນາຍົກລັດຖະມົນຕີ ທີ່ສຳນັກງານນາຍົກລັດຖະມົນຕີ , ສະຫາຍນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ປະທານສະພາແຫ່ງຊາດ ທີ່ສະພາແຫ່ງຊາດ , ສະຫາຍ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ຜູ້ຊີ້ນຳວຽກງານແນວລາວສ້າງຊາດ ທີ່ຫ້ອງວ່າການສູນກາງພັກ.

ໃນໂອກາດດັ່ງກ່າວ, ບັນດາຜູ້ນຳເຮົາຕ່າງກໍໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ຄະນະຜູ້ແທນທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ເຊິ່ງເປັນການປະກອບສ່ວນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມໃຫ້ນັບມື້ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ.

ບົດຄວາມແນະນໍາ

ສະແດງຄວາມຄິດເຫັນ