ຖະແຫຼງຂ່າວການແຂ່ງຂັນ​ກ໊ອຟ LAO GOLF CHALLENGE ຄັ້ງ​ທີ 3

ຖະແຫຼງຂ່າວການແຂ່ງຂັນ​ກ໊ອຟ

LAO GOLF CHALLENGE

ຄັ້ງ​ທີ 3

ສະຫະພັນກິລາ​ກ໊ອຟ​ແຫ່ງ​ຊາດ​ລາວ ຮ່ວມ​ກັບ​ວາລະສານ ທາ​ເກັດ ຈັດ​ພິທີ​ຖະ​ແຫຼ່ງຂ່າວການ​ແຂ່ງ​ຂັນກິລາ​ກ໊ອຟ Lao Golf Challenge ຄັ້ງ​ທີ 3 ປະຈໍາປີ 2015 ໃນ​ວັນ​ທີ 4 ມີນາ 2015 ທີ່ຕຶກ K&C Building ຊັ້ນ 3, ບ້ານ ສີສະ​ຫວາດ, ນະຄອນຫຼວງ​ວຽງ​ຈັນ ​ໂດຍການ​ເຂົ້າ​ຮ່ວມ​ຂອງ​ທ່ານ ສົງຄາມ ສີ​ລາ​ເພັດ ຮອງ​ປະທານ​ເລຂາທິການ​ສະຫະພັນກ໊ອຟແຫ່ງຊາດລາວ ມີບັນດາ​ພາກສ່ວນ​ທີ່​ກ່ຽວຂ້ອງ ແລະ ສື່ມວນຊົນເຂົ້າຮ່ວມ.

ທ່ານ ​ໄຊ​ຍະ​ສອນ ປັນຍາ​ທິບ ​ຜູ້ອຳນວຍການສ້າງວາລະສານ ທາເກັດ, ໄດ້​ກ່າວ​ວ່າ “ຈຸດປະສົງຫຼັກຂອງການຈັດການແຂ່ງຂັນກ໊ອຟໃນຄັ້ງນີ້ ແມ່ນເພື່ອສົ່ງເສີມ ແລະ ພັດທະນາວົງການກິລາກ໊ອຟຂອງລາວໃຫ້ຂະຫຍາຍຕົວຂຶ້ນເລື່ອຍໆ, ເພື່ອເປັນການສ້າງຂະບວນການໃນວົງການກິລາກ໊ອຟລາວໃຫ້ມີອັນພົ້ນເດັ່ນຂຶ້ນ, ເພື່ອເປັນເວທີແຂ່ງຂັນ, ຝຶກ​ຊ້ອມ,ຄັດເລືອກ ແລະ ເລືອກເຟັ້ນນັກກິລາກ໊ອຟສະໝັກຫຼິ້ນຂອງລາວທີມີສີມືດີເຂົ້າແຂ່ງຂັນຢູ່ໃນລະດັບສາກົນ”.

ທ່ານ​ ດີ​ລິບ ​ເຈ​ສຸທາ​ຊານ ຜູ້​ຈັດການ​ທົ່ວ​ໄປ ບໍລິສັດ ລາວຟອດ ຊີ​ຕີ້ ​ໃນ​ນາມ​ຜູ້​ສະໜັບສະໜູນ​​​ການ​ແຂ່ງຂັນ​ໃນ​ຄັ້ງ​ນີ້ ກ່າວ​ວ່າ “ ມີ​ຄວາມ​ຮູ້ສຶກ​ພາກພູມ​ໃຈ​ທີ່​ໄດ້​ເປັນ​​ໜຶ່ງ​ໃນປະກອບ​ສ່ວນຊ່ວຍ​ການ​ແຂ່ງຂັນກ໊ອຟລະດັບ Premium ​ແລະ ​ໄດ້​ນຳ​ສະ​ເໜີ​ລົດ Ford Eco sport ລຸ້ນ​ໃໝ່ນີ້ ​ໃຫ້​ຜູ້​ແຂ່ງຂັນ​ມີ​ສິດ​ໄດ້​ເປັນ​ເຈົ້າ​ຂອງ​ເພື່ອ​ເຮັດ​ໃຫ້​ງານ​ມີ​ສີສັນ​ຂຶ້ນຕື່ມ”

ທ່ານ ​ເລີ​ດກິດ ກິດຈະ​ເລີ​ນວົງ ​ ຕາງໜ້າ​ສາຍ​ການບິນ​ບາງກອກ​ແອ​​ເວ ອີກ​ໜຶ່ງຜູ້​ສະໜັບສະໜູນ​​ໄດ້​ໃຫ້​ຄວາມ​ເຫັນ​ວ່າ “ດີ​ໃຈ​ທີ່​ໄດ້​ເປັນ​ສ່ວນ​ໜຶ່ງ​ໃນການ​ປະກອບສ່ວນ​ການ​ຄັ້ງ​ແຂ່ງ​ຄັ້ງ​ນີ້ ​ແລະ ພ້ອມຈະສະໜັບສະໜູນ​ນັກ​ກິລາກ໊ອຟຂອງ​ລາວຕະຫຼອດ​ຖ້າ​ເກີດ​ມີ​ກິດຈະກຳ​ດີໆ​ແບບ​ນີ້ອີກ ​ນອກຈາກ​ນີ້​, ບາງກອກ​ແອ​ເວ​ ​ຈະ​ສົ່ງນັກ​ກິລາ​ເຂົ້າ​ຮ່ວມ​ແຂ່ງ​ຂັນຄັ້ງ​ນີ້​ດ້ວຍ”.​

ການແຂ່ງຂັນກ໊ອຟລາວຊາ​ເລັນ ໃນປີ 2015 ນີ້, ຈະໄດ້ຈັດຂຶ້ນໃນວັນທີ 4 ເມສາ 2015 ຢູ່ທີ່ສະໜາມກ໊ອຟ Long vien Golf Club.

ສຳລັບຂອງຂວັນລາງວັນ​ໃນ​ການ​ແຂ່ງຂັນ​ກ໊ອຟ​ໃນ​ປີ​ນີ້ແມ່ນ​ມີ​ຄວາມ​ພິ​ເສດກວ່າ​ທຸກໆ​ປີ, ນັກ​ກິລາ​ສາມາດຕີ​ Hold in one ຂຸມທີ 5 ຈະ​​ໄດ້ຮັບລົດ Ford Ecos port, ລູກ​ກ໊ອຟ ຄຳ ມູນຄ່າ 100 ລ້ານກວ່າກີບ ​ແລະ ​ຍັງ​ມີ​ຂ​ອງລາງວັນ​ອື່ນໆ​ອີກລວມມູນ​ຄ່າຫຼາຍ​ກວ່າ 500 ລ້ານ​ກີບ. ນອກຈາກ​ນີ້, ຜູ້​ຊະນະ​ເລີດ​ໃນ​ສາຍ​ລາວ​ຊາ​ເລັນ ຍັງ​ຈະ​ໄດ້​​ເຂົ້າ​ຮ່ວມ​ການ​ແຂ່ງ​ຂັນ ກ໊ອຟສະໝັກ​ຫຼິ້ນ ອາຊີ​ປາຊີ​ຟິກ ຄັ້ງ​ທີ 27 ​ໃນ​ລາຍການ (​ໂນ​ມູຣາຄັບ 2015) ທີ່​ສະໜາມ​ກ໊ອຟ ຢາ​ລີ້​ງ ອາ​ບູດາ​ບີ້ ສະຫະລັດ​ອາ​ລັບ​ເມິ​ເຣດ ​ໃນ​ລະຫວ່າ​ງວັນ​ທີ 20-26 ​ຕຸລາ 2015.

ບົດຄວາມແນະນໍາ

ສະແດງຄວາມຄິດເຫັນ