ດື່ມກາເຟ 3-5 ຈອກຕໍ່ມື້ ປ້ອງກັນຫົວໃຈວາຍໄດ້ແມ່ນແທ້ບໍ່.

ຄົນທີ່ມັກດື່ມກາເຟ ຕ້ອງຢາກຮູ້ເລື່ອງນີ້ຢ່າງແນ່ນອນ , ຜົນການວິໄຈຫຼ້າສຸດພົບວ່າ: ການດື່ມກາເຟມື້ລະ 3-5 ຈອກ ຈະຊ່ວຍປ້ອງກັນພະຍາດຫົວໃຈ ເພາະຟັງເບິ່ງແລ້ວອາດຈະຂັດກັບຄວາມຮູ້ທີ່ເຄີຍໄດ້ຟັງມາເນາະ.

ແຕ່ຕ້ອງຍອມຮັບວ່າ: ເວລາອ່ານຂໍ້ມູນເລື່ອງກາເຟ ທີ່ນັກວິໄຈແຕ່ລະສະຖາບັນເຮັດການສຶກສາມາກໍເຮັດໃຫ້ງົງໆ ເພາະບາງສະຖາບັນກໍເວົ້າວ່າ: ດື່ມກາເຟດີຕໍ່ສຸຂະພາບ ໃນຂະນະທີ່ບາງແຫ່ງກໍເວົ້າວ່າ: ກາເຟເປັນເຄື່ອງດື່ມຕົວຮ້າຍ ດື່ມແລ້ວເຮັດໃຫ້ຄວາມດັນເລືອດສູງ ໃຈສັ່ນ ເພີ່ມຄວາມສຽງຂອງພະຍາດຫົວໃຈ ແລະ ອີກຫຼາຍໆອັນທີ່ມາຈາກສານຄາເຟອິນ ທີ່ຢູ່ໃນໝາກກາເຟ.

​​ໃນ​ຕົ້ນ​ເດືອນ ມີນາ 2015 ມີຜົນ​ງານ​ວິ​ໄຈ​ທີ່​ຕີ​ພິມ​ໃນ​ວາລະສານ Journal Heart ​ທາງ​ທີ​ມວິ​ໄຈ​ຈາກ​ມະຫາວິທະຍາ​ໄລ​ກັງ​ບັດ ຊໍາ​ຊຸງ ​ໃນ​ກຸງ​ໂຊ ​ປະ​ເທດ​ ສ ເກົາຫລີ ອອກ​ມາ​ເປີດເຜີຍ​ໃຫ້​ຮູ້​ວ່າ: ການ​ດື່ມ​ກາ​​ເຟ​ໃນ​ປະລິມານ 3-5 ຈອກ​ຕໍ່​ມື້ ຊ່ວຍຫຼຸດ​ໂອກາດ​ທີ່​ຈະ​ເກີດການ​ສະ​ສົມ​ຂອງ​ “ແຄວ​ຊຽມ” ທີ່​ເພດານ​ຂອງເສັ້ນ​ເລືອດທີ່​ໄປ​ລ້ຽງ​ຫົວ​ໃຈ​ໄດ້ ຊ່ວຍຫຼຸດຄວາມ​ສຽງ​ຫົວ​ໃຈ​ວາຍ​ໄດ້ ຖື​ວ່າ​ເປັນຜົນ​ການ​ວິ​ໄຈ​ທີ່​ໜ້າ​ສົນ​ໃຈ.

​​ນັກວິ​ໄຈ​ ໄດ້​​ເຮັດ​ການ​ສຶກສາ​ເລື່ອງ​ນີ້​ກັບ​ພະນັກງານ​ຄົນ​ເກົາຫລີ ທັ້ງຊາຍ ​ແລະ​ ຍິງ 25.138 ຄົນ ​ເພື່ອ​ຊອກ​ຄວາມ​ສຳພັນ​ລະ​ຫວ່າງ​ ການ​ດື່ມ​ກາ​​ເຟ ກັບ​ການ​ເກີດ​ “ແຄວ​ຊຽມ” ​ໃນເສັ້ນ​ເລື​ອດຫົວ​ໃຈ,ພາຍຫຼັງ​ເກັບ​ຂໍ້​ມູນ ​ແລະ​ ສະ​ແກນ​ຮ່າງກາຍ​ຂອງ​ຜູ້​ຊາຍ​ເຂົ້າ​ຮ່ວມ​ການ​ວິ​ໄຈ​ທຸກ​ຄົນ ​ແມ່ນ​​ໄດ້ຜົນ​ສະຫຼຸບວ່າ: ພະນັກງານ​ທີ່​ດື່ມ​ກາ​​ເຟ​ໃນ​ປະລິມານ​ທີ່​ເໝາະສົມ​ຄື 3-5 ຈອກ​ຕໍ່​ມື້ ມີ​ຄວາມ​ສຽງ​ທີ່​ຈະ​ເກີດ​ພະຍາດທີ່​ກ່ຽວ​ກັບຫົວ​ໃຈ ​ເຊັ່ນ ເສັ້ນເລືອດ​ແຂງ​ຕົວ ໜ້ອຍກວ່າຄົນ​ທີ່​ດື່ມກາ​ເຟບໍ່​ຮອດ 3 ຈອກ ແຕ່ຜົນວິໄຈພົບວ່າຖ້າ​ດື່ມ​ກາ​ເຟ​ເກີນ​ມື້​ລະ 5 ຈອກ​ຂຶ້ນ​ໄປ ຈະ​ມີ​ຄວາມ​ສຽງ​ພະຍາດຫົວ​ໃຈຫຼາຍທີ່​ສຸດ.

​ໃນ​ການ​ວິ​ເຄາະ ນັກວິ​ໄຈ​ເບິ່ງ​ເຖິງ​ແນວ​ໂນ​ມຂອງ​ການ​ເກີດ​​ພະຍາດຫຼອດ​ເລືອດຫົວ​ໃຈ​ຕີບ ​ເຊິ່ງ​ເກີດຂຶ້ນ​ໄດ້​ເມື່ອ​ມີ​”ແຄວ​ຊຽມ” ຫຼື​ ໄຂມັນ ​ໄປ​ເກາະ​ຕິດ​ເພດານເສັ້ນ​ເລືອດ ​ໂດຍ​ໃນ​ກຸ່ມ​ຕົວຢ່າງ​ນີ້​ບໍ່​ພົບ​ວ່າ ມີ​ໃຜ​ເປັນ​ພະຍາດ​ຫົວ​ໃຈ ​ແຕ່​ພົບ​ວ່າ​ກຸ່ມ​ຕົວຢ່າງ​ກ່ວາ 1 ​ໃນ 10 ມີ​ການ​ສະ​ສົມ​ຂອງ​ “ແຄວ​ຊຽມ​” ໃນເສັ້ນເລືອດ.

​ເຖິງຢ່າງ​ໃດ​ກໍ​ຕາມ ຜົນ​ການ​ວິ​ໄຈ​ນີ້ ​ກໍ່​ໃຫ້​ເກີດ​ການ​ຜິດ​ຖຽງ​ໃນ​ເລື່ອງ​ຄຸນ​ປະ​ໂຫຍ​ດ ຫຼື​ ໂທດ​ຂອງ​ກາ​ເຟຢູ່ ​ເຊິ່ງນັກວິ​ໄຈ​ຂອງ​ເກົາຫລີ ​ກໍ​ບອກ​​ຕອນ​ທ້າຍ​ວ່າ: ຂໍ້​ສະຫຼຸບນີ້​ຍັງບໍ່ຊັດເຈນ​ປານ​ໃດ ​ເພາະ​ຕ້ອງ​ຄົ້ນ​ຄ້ວາ​ເພີ່​ມ​ອີກ ຂະນະ​ທີ່ ນັກວິຊາການ​ໃນປະເທດ​ອັງກິດ ​ກໍ​ບອກ​ວ່າ: ຜົນ​ວິ​ໄຈ​ນີ້​ອ້າງ​ອີງ​ຈາກ​ປະຊາກອນ​ເກົາຫລີ ເທົ່າ​ນັ້ນ​ເຊິ່ງມີ​ສະ​ຕາຍ​ການ​ກິນ​ອາຫານ ​ແລະ​ ວິ​ຖີວິດ​ຕ່າງ​ຈາກ​ຊາວ​ອັງກິດ ຈຶ່ງ​ຍັງ​ສະຫຼຸບບໍ່​ໄດ້​ວ່າ: ຄວາມເປັນຈິງ​ແລ້ວ ກາ​ເຟດີ ຫຼື ບໍ່​?

ບົດຄວາມແນະນໍາ

ສະແດງຄວາມຄິດເຫັນ