ການຄຸ້ມຄອງມາດຕະຖານ ແລະ ການລັກລອບລິຂະສິດຍັງເປັນສິ່ງທ້າທາຍ. ຜະລິດຕະພັນທີ່ໄດ້ຮັບຄວາມນິຍົມຂອງຫຼວງພະບາງແມ່ນຫຍັງ?

ການຄຸ້ມຄອງມາດຕະຖານ ແລະ ການລັກລອບລິຂະສິດຍັງເປັນສິ່ງທ້າທາຍ.

ຜະລິດຕະພັນທີ່ໄດ້ຮັບຄວາມນິຍົມຂອງຫຼວງພະບາງແມ່ນຫຍັງ?

ຜະລິດ​ຕະພັນທີ່ມີຊື່ສຽງ​ຂອງ​ແຂວງຫຼວງພະບາງ ​ມີ​ຫຼາຍ​ຢ່າງ​ທີ່​ໄດ້​ຂາຍ​ດີ​ ເປັນ​ຕົ້ນ​ແມ່ນ​ແຜ່ນ​ແພ ການປັກຖັກແສ່ວລວດລາຍພື້ນບ້ານ ພື້ນເມືອງບູຮານ ທີ່​ເປັນ​ໜ້າ​ເປັນຕາ​ໃຫ້​ແຂວງ , ​ກໍຄືທາງ​ສະມາຄົມ​ຂອງ​ພວກ​ເຮົາ ໃນ​ເວລາ​ໄປ​ອອກ​​ງານ​ວາງ​ສະ​ແດງ ​ແລະ ຈຳໜ່າຍ​ຢູ່​ພາຍ​ໃນ ​ແລະ ຕ່າງປະ​ເທດ , ອີກ​ຢ່າງ​ໜຶ່ງ​ເຄື່ອງ​ທີ່​ໄດ້ຂາຍ​ດີໃຫ້​ຄົນ​ທ່ອງ​ຖິ່ນ, ນັກ​ທ່ອງ​ທ່ຽວ​ພາຍ​ໃນ​ກໍ​ແມ່ນ​: ເຄື່ອງ​ເງິນ​ ມີ​ຊື່​ສຽງ​ປະຫວັດ​ມາດົນນານ ​ດ້ວຍ​ສີມື​ນາຍ​ຊ່າງ​ຊາວ​ວັງ, ພ້ອມ​ນີ້​ກໍ​ມີ​ຊ້ານ້ຳ​ກ້ຽງ, ​ເຄື່ອງ​ປັກ​ດິ້ງ​ຄໍ​ເສື້ອ, ​ເຈ້ຍສາ​ກຳລັງ​ມີ​ຕະຫຼາດ​ກວ້າງຂວາງເປັນຕົ້ນແມ່ນມີອໍເດີ້ຈາກປະເທດຍີ່ປຸ່ນມາຫຼາຍສົມຄວນ.ເຄື່ອງ​ໄມ້​ແກະ​ສະ​ຫຼັກ​ພະພຸດທະ​ຮູບຕິດຄຳປິວ, ແກະລວດລາຍບູຮານລາວ ​ເອກະລັກ​ແມ່ນ​ຈະ​ເອົາ​ຈຸດ​ເດັ່ນ​ຂອງ​ແຂວງ​ເຊັ່ນ: ວັດ​ຊຽງ​ທອງ, ທາດ​ພູ​ສີ, ປູ່​ເຍີ​ຍ່າ​ເຍີ, ສ່ວນການເຮັດ ຫົວ​ໂຂນ ກໍເປັນຜີມືຊ່າງທີ່ເປັນເອກະລັກຂອງຫຼວງພະບາງເຊັ່ນ: ນາງ​ແກ້ວ, ທົດ​ສະກັນ, ພະ​ອິນ​ພະ​ພົມ ຍັງ​ມີນາ​ຍຊ່າງ​ພື້ນ​ເມືອງ​ ແລະ ມີຜູ້ສືບທອດຫຼາຍ​ຄົນ , ​ແຕ່​ການ​ນຳ​ໃຊ້​ຫົວ​ໂຂນ​ ໃນປັດຈຸບັນແມ່ນ​ມີ​ໜ້ອຍ ​ຍ້ອນ​ວ່າມີ​ລາຄາສູງ ຖ້າຫາກຕິດຄໍາປິວຍິ່ງ​ແພງ​ຂຶ້ນ​ໄປ​ຕື່ມ​ອີກ.

ປັດຈຸບັນສະມາຄົມມີຈັກຫົວໜ່ວຍມີການເຄື່ອນໄຫວແນວໃດ?

ສະມາຄົມ​ຫັດຖະກຳ​ ປັດຈຸບັນມີ 30 ຫົວໜ່ວຍ​ຢູ່ພາຍ​ໃນ​ເມືອງ , ບ້ານ​ຜາ​ນົມ ກໍ​ເປັນ​ຫົວ​ໜ່ວຍໜຶ່ງທີ່ໃຫ່ຍກວ່າໝູ່ໃນສະມາຄົມ ນອກນີ້ຍັງມີບ້ານ ນາ​ຍາງ, ບ້ານ​ລື້ ມີ​ຊື່​ສຽງ​ໃນການ​ຜະລິດ​ຜ້າ​ຝ້າຍ ລວມມີ 5 ໝູ່​ບ້ານ​ ປະຊາຊົນສ່ວນໃຫ່ຍມີ​ອາຊີ​ບ​ເຮັດ​ສວນ, ​ເຮັດ​ນາ ສ່ວນແມ່ຍິງ ຕໍ່າ​ຝ້າຍ​ເປັນ​ອາຊີບ​ເສີມ.

ສິ່ງທ້າທາຍສໍາລັບສະມາຄົມມີຫຍັງແດ່?

ສັງ​ເກດ​ເຫັນ​ ຍັງ​ມີ​ຄົນ​ຕ່າງຊາດນໍາສິນຄ້າຂອງປະເທດເຂົາເຈົ້າ ມາຂາຍປະປົນນໍາສິນຄ້າພາຍໃນ ບາງຄັ້ງກໍສວຍໃຊ້ແອບອ້າງນໍາໃຊ້ ກາໝາຍຂອງເຮົາ, ກາ​ໝາຍດັ່ງກ່າວ​ເພື່ອ​ສົ່ງ​ເສີມ​ການ​ຜະລິດ​ຂອງຫຼວງ​ພະ​ບາງ​ໃຫ້​ຮູ້​ວ່າ ​ເປັນ​ສິນຄ້າ​ທີ່​ໄດ້​ມາດຕະຖານ​ ສົ່ງເສີມສີມືນາຍຊ່າງຫັດຖະກໍາ ພາຍໃນແຂວງ​ໂດຍໄດ້​ເລີ່​ມ​ນໍາໃຊ້​ມາ​ໄດ້ 3 ປີ​ແລ້ວ​ ແຕ່​ກໍ​ຍັງ​ມີ​ສິນຄ້າ Copy ຈໍານວນໜຶ່ງມາວາງຂາຍ ​ສິ່ງນີ້ກໍເປັນສິ່ງທ້າທາຍພວກເຮົາສົມຄວນ ເພາະ​ເຮົາ​ຍັງ​ບໍ່​ມີ​ລິ​ຂະ​ສິດ​ (ສິດທິ​ບັດ) ດັ່ງນັ້ນຢາກໃຫ້ທາງການ​ຄ້າ​​ຊ່ວຍ​ເບິ່ງ​ຄືນ​ເພາະ​ເປັນ​ສິ່ງ​ທ້າ​ທາຍ​ໜຶ່ງ​ຂອງ​ເຮົາ ແລະ ຈະເຮັດໃຫ້ເອກະລັກຂອງແຂວງສູນເສຍໃນໄລຍະຍາວ .

​       ໄລຍະຜ່ານມາທາງສະມາຄົມພວກເຮົາ​ກໍ່​ເຮັດ​ຕາມ​ພາລະ​ບົດບາດ ​ໜ້າ​ທີ່​ຢ່າງ​ເຕັມ​ສ່ວນ, ພວກ​ເຮົາ​​ໄດ້​ນໍາພາສະມາຊິກອອກ​ງານ​ຕະຫຼາດນັດ​ສາກົນ ​ເປີດ​ໂລກະທັດ ​ວິ​​ໄສ​ທັດ ຜ່ານ​ມາ​ກໍ​ມີ ​ຍີ່ປຸ່ນ, ​ເອີຣົບ, ​ອາ​ເມຣິກາ, ຈີນ, ຫວຽດນາມ, ​ໄທ ສັງລວມແລ້ວການ​ຂະຫຍາຍຕົວ​ວຽກ​ງານ​ຫັດຖະກຳແຂວງແມ່ນມີຕົວເລກຂະຫຍາຍຕົວ​ເພີ່​ມຂຶ້ນ​ປະມານ 20%.

ສໍາລັບວິ​ໄສ​ທັດ ແລະ ​ເປົ້າ​ໝາຍ​ຂອງ​ສະມາຄົມ​ ແມ່ນແນໃສ່ ການ​ຮັກສາ​ຮູບແບບການຜະລິດທີ່ເປັນເອກະລັກ,ສ້າງນາຍຊ່າງຜີມື ໃຫ້ຄົງຢູ່ກັບຄົນລຸ້ນສືບທອດຕະຫຼອດໄປ ຖືເປັນວຽກງານໜຶ່ງທີ່ເອົາໃຈໃສ່ເປັນພິເສດ , ຜ່ານມາກໍໄດ້ມີການຈັດເຝິກອົບຮົມ ການໄປທັດສະນະສຶກສາ ການເຊື້ອເຊີນອາຈານມາສິດສອນຖ່າຍທອດຄວາມຮູ້ຕ່າງໆ.

ບົດຄວາມແນະນໍາ

ສະແດງຄວາມຄິດເຫັນ